Under her finn du nokre av mine arbeid gjennom 2019/2020. For å sjå meir av mine prosjekt, besøk bendiksen.design på instagram. Ta gjerne kontakt dersom du ynskjer hjelp til grafisk arbeid - eg er ledig!
Når ein har tatt steget og bestemt seg for å starte eigen bedrift kjem det mange ting ein må tenke på. Logo er eitt av dei. Logoen er meir enn eit merkenamn. Mange logoar nyttar både tekst og ikon. Det hadde eg i tankane då eg lagde min eigen logo, og tenkte - kvifor ikkje kombinere både tekst og ikon? Dette gjorde eg ved å la Bendiksen Design stå langs ryggen på ein stor B. Resultatet enda i ein distinkt logo som er lett å kjenne att, som òg tek seg godt ut på både store og små format, trykksaker, klistremerker og liknande.
I denne oppgåva skulle eg utvikle strategi og designkonsept på eit nytt magasin. Som tema for oppgåva valte eg å lage eit magasin med temaet "Arrangement i Bergen". Dette var dermed eit magasin som skulle innehalde ulike arrangement som finn stad her i Bergen, og der all informasjon er samla på ein stad. Dette var tenkt til å vere eit gratismagasin, som ein til dømes finn ved inngangen på Galleriet. Innhaldet er variert med ulike arrangement, nokre intervju, quiz og sudoku med meir. Alle illustrasjonar er laga av meg i Adobe Illustrator.
Gjennom mine to år på Høyskolen Kristiania har plakat/poster vore i oppgåve begge åra. Den fyrste posteren eg laga, var for Dada Hårstudio. Oppgåva gjekk ut på å lage ein poster som vart knytt til dadaismen, som er ei kulturell rørsle som oppstod av kunstnarar og forfattarar på tidleg 1900-tal. Dette var i samband med ein konkurranse blant oss førsteårsstudentar, der mitt bidrag var ein av tre som vann. I seinare tid har posteren hengt på salongen i Nygårdsgaten. Den andre oppgåva gjekk ut på å lage ein poster av eit dikt frå ein kjend norsk forfattar. Der valte eg å tolke min versjon av diktsamlinga "Jeg gikk meg vill i skogene" av Inger Hagerup, ved å legge på ein fading-effekt på bokstavane som står som ein slags sti nedover, og med ein illustrasjon av ei jente som vandrar innover. Dette skapar ein illusjon av at ein går seg vill i bokstavane, og at jenta ikkje heilt veit kvar vegen fører ho.
Her har eg laga logo til ein kunde som ynskja ein logo til sitt enkeltmannsforetak - der han i all hovudsak driv med kystfiske. Han ville ha ein logo som ein lett kunne assosiere med verksemda, så det enda med ein logo der logoikonet er ein eksakt replika av fiskebåten hans og tilhøyrande tilleggselement. Alt er teikna i Adobe Illustrator.
Dette er mitt siste prosjekt, der eg fekk i oppdrag om å lage ein logo for Urtebakeriet, som er eit gardsbakeri med fokus på det tradisjonelle. Tidlegare gjekk dei under namnet "Urtemakeriet", men då dei endra namn, måtte dei òg ha ein ny logo. Kunden ynskja å bevare det rustikke, men og halde det stilreint. Dette løyste eg med å nytte ein elegant font som var litt slitt innimellom, og ved å teikne eit logoelement som bedrifta kan assosierast med - nemlig urkorn. Tilleggsfargar er inspirerte av ulike nyansar som det er å finne på ulike typar egg, som igjen er med på å bevare det tradisjonelle og gardsbaserte.
I denne oppgåva skulle eg utvikle ein dynamisk identitet for Miljøpartiet dei grøne (MDG) med tilhøyrande designmanual (regelverk) som sikra at identiteten framstår heilskapleg og attkjenbar. Denne oppgåva harhandla altså om å endre og utvikle ein ny grafisk profil for Miljøpartiet dei grøne. Ny logo skulle lagast, samt fargar og fontar. I tillegg lagde eg ikon i eit bevisst og gjennomgåande mønster (low-poly) som bestod av trekanta former. Desse trekantane er å finne gjennomgåande i heile designmanualen med ulike utformingar og storleikar. Dette har gjort slik at designmanualen har fått meir særpreg og eit vel utført tema.
I tillegg til kundeoppdrag og andre oppgåver, driv eg med eigne illustrasjonar på fritida. Eg har teikna alt frå nostalgiske attributtar som eg sjølv vaks opp med, til single-line drawings. Alt er illustrert av meg i Adobe Illustrator.
Eg er så heldig som har tilgang på ein laserkuttar på skulen, som eg nyttar til å lage ulike eigendesigna ting som blant anna bagasje-tags, husnummer, dørskilt og flaskeopnarar.
I tillegg til grafisk design og digitalt arbeid, likar eg òg å ta bilete. Heilt frå eg var lita har eg alltid vore glad i å lage album, redigere bilete og forevige minner. Her er eit lite utval av mine absolutte favorittar:
